I me disi che son mato però i magna sempre tuto. Me piasi le "Contaminazioni Gastronomiche". Presempio: Per scaldarse le rece luganighe de cragno e capuzi garbi aio oio e peperoncino. Le cragno se le fa solito modo boìde. Per i capuzi (mi dopero quei in busta de aluminio che ciogo de Hofer a Sesana, austriaci, boni e a bon prezo) meter in tecia a fredo aio strucà, oio bon e peperoncino. Lasar che ciapi gusto per almeno una mezaora, impizar el fogo e co' taca frizer butar i capuzi, rosolar un minuto, zontar due biceri de acqua e far consumar pian pian fino a cusinarli al dente. Se servi zontar acqua poco ala volta. La quantità de peperoncino dipendi da quanto che se vol scaldar le rece. A mio aviso se compagana 'sai ben con un vin stagno tipo Teran.