La città proibita [recensione]

[babatriestina]

Go vardado in DVD sto film, depoco arivado al noleggio.

Mi go visto diversi de sti film de ambiente cinese, e questo, del solitop Yang Zhimou e con Gong Li ( i do de lanterne rosse) me ispirava. In complesso son abastanza soddisfatta, senza acclamar al capolavoro.

la storia xe un polpetton con trama de fotoromanzo -feuilleton:

semo al tempo dei Tang ( un poco prima del anno Mille), ma podessi esser qualsiasi periodo mitico, o come che disi el libretto de Turandot: a Pechino, al tempo delle favole.

Xe un imperator e un'imperatrice con 3 fioi, masci, tuti 3 de madri diferenti, el secondo xe fio del imperatrice.

I vivi nela città proibita, e là xe un gran pecà che no i ghe gabi permesso come nel ultimo imperatore de doprar la vera, ma i la ga ricostruida in studio. i interni xe ridotti a alcune camere e un lungo corridoio a colonne de colori assai zigaloni quasi al neon. i costumi inveze xe molto molto bei.

el imperator disi che la famiglia imperial xe importante, che i devi dar el bon esempio de pase, amor e concordia, e po se vederà che inveze soto xe tuto altro : parenti serpenti e ipocrisia a biondodio.

L'imperatrice devi bever ogni giorno una tisana, che dovessi guarirla de un mal che no se sa ben cossa sia, ma vien fora che ogni volta che la lo bevi la sta pezo: dopo un poco vien fora che i la sta invelenando, e che el velen lo meti el medico imperial, col aiuto dela fia, per conto del imperator. ma per ipocrisia la devi far finta de gnente e continuar a bever. In realtà la sta preparando la sua vendetta, la sta ricamando dei crisantemi per la gran festa dei crisntemi, in cui el secondo fio farà una rivoluzion. La xe anche l'amante del primo fio, che però xe amante dela fia del medico. ma salta fora una donna sconosciuta, che xe po la moglie del medico, ma la xe anche la prima moglie del imperator, mama del erede imperial, che iera creduda per morta: cussì i do amanti xe fradel e sorela! Fughe, un pochi dei soliti inseguimenti e el solito cappa e spada ala cinese, con spade, spadaccini, donne che duella come omini, salti, capriole...

el terzo fio anonimo se ribella e copa el primo, el secondo fa la rivoluzion dei crisantemi, ma i sui 10 mila omini xe sopraffatti dei omini del imperatoro, che intanto ga perso el controllo de sè e ga copado el terzo fio. El secondo fio ribelle vien catturado e ghe vien oferta la vita.. se el invelena la mare. el se rifiuta e el se copa.

Quindi ala fin resta solo che la coppia imperial e el imperator disi No se fa gnente, continuemo la festa, el cortil con migliaia de morti vien immediatamente netado, sostituidi de migliaia de vasi de crisantemi, e tuto finissi a foghi de artificio. Ma el imperator no ga più fioi .

impressioni: trama troppo artificiosa, me domando se in Cina i la aprezza, anche i duelli a mi me par come dir troppo miracolosi, ma forsi al pubblico cinese ghe piasi sti effetii speciali, la foresta dei pugnali volanti iera ancora de più. Anche qua, me domando se riusciremo a capir l'atmosfera cinese.

La lezion che mi me ga parso de cavar dele scene dela rivolta sedada xe che te pol tentar una rivoluzion, ma ghe xe tanti e tanti cinesi che compari a difender el ordine costituito, che no i ariverà mai. E la cancelazion del oror e la ripresa dela festa me ga ricordado la repression de Piazza Tien An Men, che po xe propio davanti dela Città proibita, e l'esaltazion delmiracolo economico cinese successivo.

Attori molto bravi, soprattutto la coppia imperial.