Dispersione delle ceneri

[Starlite]

Par che el comun gabi deciso de consentir la dispersion delle ceneri (quasi ovunque), meno che nei giorni de bora (ovviamente )

A seguito de ciò se ga sprecado, come al solito, interventi e commenti alla decision (che me par no eser definitiva ancora, perché me par che xe passada in Giunta ma devi ancora passar in Consiglio, se non erro).

Nei ultimi giorni iera sul Piccolo un per de articoli in merito.

Uno dedicado a quel che ga dito el vescovo che xe contro questo e ga rammentado ai fedeli che no se devi disperder le ceneri.

Anche Dipiazza ga dito de no esser personalmente favorevole alla cosa, ma viste le richieste pervenude da parte de singoli cittadini e vista la legge nazionale che consenti de far ciò, el ga pensado de consentir la cosa.

Secondo mi xe solo che una roba positiva. Se un vol le disperdi, se un no vol no lo fa, come se un no vol no se fa nianche cremar (o chi resta insomma se spera decidi in base a quel che voleva el defunto, ma quel xe un altro discorso).

[Cazzaballe]

Anche mi me par una roba giusta. Alla fine da la possibilità a chi vol render onor a un desiderio del caro scomparso de poderlo far liberamente...

Credo sia una buona cosa.

[Nona Picia]

Penso che la libertà de scelta anche in questo xe una bela roba, anche se capisso che el vescovo devi far el suo mestier....

[babatriestina]

ognidun fa quel che vol, mi devo dir che tanto me par igienico cremar, e per chi che vol, tegnirse in giardin o sul caminetto l'urna cole ceneri de povera mama, altrettanto me par meno igienico disperder le ceneri.

Cussì oltre le ceneri della ferriera, se riscia de ciapar quele de nono, se la roba prendessi piede per bon.. scherzo, ovviamente.

inveze me par che i media gabi fatto un voludo travisamento nei titoli:

el discorso del vescovo de come che i riporta, disi che nol ga gnente de ridir che el Comun deliberi come che el vol ( e me par ovvio) ma che el ghe ricorda ai cristiani cattolici che saria meo no disperder le ceneri ma conservarle in un logo anche per la memoria. Un discorso rivolto ovviamente a chi che cristian se senti.. e anche questo me par logico. Inveze i media la trasformado questo, nei titoli a effetto, in una El vescovo proibissi de disperder ( per no parlar po de quei che ga capido che el proibissi la cremazion..).

Mi comunque, prima che vegni fora sto regolamento comunal, son sicura de gaver letto un'intervista con qualchedun de cesa, probabilmente el Cardinal Martini, che diseva che in sè no ghe trova gnente de criticabile in un che volessi disperder le proprie ceneri per motivi ecologici o per amore dela natura. che un che credi nel onnipotenza de Dio no ga nissun problema a pensar che se El ga creado el mondo del nulla nol podessi anche reingrumar le ceneri del mar o dove che le sia finide. Ovio che se inveze un lo fa aposta come per spudarghe in ocio ala cesa, alora xe un altro discorso..

Modificato 22 Maggio 2010 da babatriestina

[tifone]

A parte esser daccordo sulla dispersion si,volevo chiederve se savè se se pol tegnir in casa le ceneri dei propri cari o xe vietato o iera vietato?Grazie

[Starlite]

A parte esser daccordo sulla dispersion si,volevo chiederve se savè se se pol tegnir in casa le ceneri dei propri cari o xe vietato o iera vietato?Grazie

Me par che questo el Comun de Trieste lo ga za consentido, o se no lo consentirà insieme alla dispersion, no me ricordo più cos che iera scrito nell'articolo

[Stefano79]

D'accordissimo, xe un passo avanti finalmente. El giro de speculazioni che xe drio la morte xe a dir poco vergognoso. Quando uno mori in pratica diventa de proprietà dello stato, con mille limiti e vincoli.

Fossi per mi consentiria anche de seppellir un parente nel proprio giardin privato, per chi lo ga, senza esser costretti ad alimentar tutta la filiera de chi magna sul dolor della gente...

[Stefano79]

Poi sulla seconda domanda no savesi, forsi preferiria tenirmele in casa, ma prima de tutto rispettasi el voler del parente.

Modificato 22 Maggio 2010 da Stefano79

[babatriestina]

El giro de speculazioni che xe drio la morte xe a dir poco vergognoso. Quando uno mori in pratica diventa de proprietà dello stato, con mille limiti e vincoli.

te me spieghi meo cossa che te intendi? visto che mi go avudo de occuparme de diversi funerai de famiglia, a partir de quei dei mii genitori, e no me son accorta che qualchedun gabi speculado su de mi o su de lori.

[cucciolina]

Go votado si alla prima e non so alla seconda. Se proprio xe el desiderio de un mio caro lo faria, altrimenti no. Son sempre stada convinta che el ricordo della persona resta sempre senza bisogno de gaver qualcosa de fisico vicin (bare o ceneri che sia).

[Stefano79]

te me spieghi meo cossa che te intendi? visto che mi go avudo de occuparme de diversi funerai de famiglia, a partir de quei dei mii genitori, e no me son accorta che qualchedun gabi speculado su de mi o su de lori.

Quando uno mori el corpo vien portado via e (che mi sappio) no xe dado de saver cosa ghe vien fatto sora prima del funeral. Spesso vien fatte autopsie anche co no servisi, magari per farghe far pratica a qualche dottorin pena laureado. Di per sè pol sembrar normale, ma l'idea che el corpo de un mio caro vegni usado come "palestra" o come teatrin per qualche comitiva de studenti annoiadi sinceramente no me entusiasma. Go parlado con più de qualche studente che ga assistido ad autopsie. Da come i me la ga descritta xe un rispetto della persona pari a zero. El corpo vien svodado tipo una borsa della spesa per dopo esser riempido a casaccio. Go capì che el xe morto, però.........

Parlemo de un funeral? El giro de affari che ruota sulla morte xe impressionante. I necrologi sul Piccolo ga prezzi VERGOGNOSI. Le aziende de pompe funebri te tira fora sti cataloghi stile agenzia de viaggi con tutti gli optional possibili immaginabili...nianche me rivolgesi a lori per puro piacer e no ghe fossi costretto!

Insomma, secondo mi xe uno schifo, e no me par giusto esser costretto ad ingrassar sta gente.

Modificato 24 Maggio 2010 da Stefano79

[AFABIO]

Go risposto 'si' alla prima domanda.

Alla seconda go pure risposto 'si' nel senso che se questo fossi stado el desiderio de uno dei miei cari lo gavessi fatto.

Aggiungo che son contento che da un poco de tempo la cremazion xe permessa a Trieste anche in assenza de una volonta' scritta.

Nel 1986 mi go 'perso' mio fradel e poi mia mamma mentre i se trovava a Trieste e per esaudir i loro desideri go dovudo 'portarli' a Villaco per la cremazion. Tutto organizzado e fatto, in giornata, tramite Zimolo.

Le loro ceneri assieme a quelle de mio papa' che essendo morto negli USA le go dovude portar a Trieste (dopo un iter de permessi e nulla-osta da parte del Consolato Italiano de NY) le xe a S.Anna nella nostra tomba de famiglia.

Trovo un certo 'conforto', che non so' spiegarme, nell'andar a 'trovarli' quando vegno a Trieste.

F.

[babatriestina]

Quando uno mori el corpo vien portado via e (che mi sappio) no xe dado de saver cosa ghe vien fatto sora prima del funeral. Spesso vien fatte autopsie anche co no servisi, magari per farghe far pratica a qualche dottorin pena laureado.

alora, qua sarò precisa, proprio per esperienza familiar: dipendi de dove che un mori.

Se te mori in casa ( raro, ma mi go organizzado cussì per mia mama e prima ancora mia nona) una volta che due dottori ( per sicurezza, che no sia robe losche) ga certificado la morte, te pol far portar via ma te li pol anche come nel mio caso gavemo fatto, lassarli in casa, la ditta vien in casa, porta la cassa de morto, lo sistema dentro, e el defunto va direttamente de casa sua al cimitero. Mama xe stado cussì e xe stada cremada per question de spazio in tomba de famiglia.

Quei come papà che mori in clinica, nel suo caso al Sanatorio, no i ghe fa gananche alcuna autopsia, i li porta subito via, i li metti in cella frigorifera e po funeral consueto. Me gavevo informado .

resta quei come una zia, che mori in ospedal, ela xe morta a Cattinara e là effettivamente xe la alta possibilità che i fazzi autopsia, a meno che i parenti no fazi una dichiarazion de opposizion:in sto caso i parenti più prossimi ga dito che zia no ga più bisogno de gnente e che xe giusto contribuir al progresso dela scienza e cussì i la ga ben taiuzzada, immagino, perchè al funeral la me pareva un fiadin cambiada, però mi credo che el importatnte xe quel che se fa per lori de vivi. In più volevo capir esattamente de cossa che la xe morta, anche se a 89 anni insomma no se podeva parlar de morte prematura..

In tuto questo no ghe xe alcuna question de soldi.

Parlemo de un funeral? El giro de affari che ruota sulla morte xe impressionante. I necrologi sul Piccolo ga prezzi VERGOGNOSI. Le aziende de pompe funebri te tira fora sti cataloghi stile agenzia de viaggi con tutti gli optional possibili immaginabili...nianche me rivolgesi a lori per puro piacer e no ghe fossi costretto!

parlemo de prezzi de funerai.. mio nono una volta co qualcossa iera caro rispondeva "una cassa de morto costa de più", mi lo gavevo ciapado sul serio e savevo che un funeral costa ( ma credo che un matrimonio costi assai de più, un vestito de sposa costa ben più che una cassa de morto, me par).

Concordo coi prezzi dei necrologi del Piccolo, i xe esosi, se ben me ricordo per la zia gavemo diviso coi nipoti, lori el funeral e mi el necrologio e no me pareva tanta differenza.. per mio papà i mii amici me ga telefonado: "necrologio o elargizion? perchè tuti due costassi troppo" e mi ghe go dito Elargizion alora, che almeno i bori va a qualchedun che ghe servi. Una curiosità: gavè presente che speso nelle partecipazioni al lutto del Piccolo xe soli i nomi? xe anche perchè nel costo, le parole costa de meno, i nomi costa de più e la gente sa che nome-cognome costa el doppio del semplice nome. Po dipendi anche del carattere e della spaziatura.

Per i funerai, almeno adesso no xe le categorie, una volta a seconda de quel che te pagavi te gavevi diritto al carro coi vetri o a quel senza i vetri.. adesso almeno el trasporto xe sempre quel, se paga el apertura dela tomba.. la cassa costa prezzi diferenti, ma dipendi anche de come che un la la vol, se le vedi in catalogo, no ocori cior quele più de lusso, cole maniglie speciali.. disemo anche che no xe un lavor divertente, che mi almeno no me piasessi far e chi che lo fa se fa pagar. No me ricordo cataloghi come che te disi, gavemo concordado i prezzi e anzi devo dir che li devo gaver ringraziai perchè in quei momenti no se ga sempre la testa per ricordarse de tutto. Certo, un funeral costa, e per fortuna ognidun ghe ne ga un solo nela vita.

Comunque adesso qua no go sotto man i costi e le ricevute dei funerai ( grazie a Dio xe roba passada de oltre 10 anni), ma dir che i costi xe vergognosi senza dir una cifra me par un poco impreciso e no aiuta la gente a farse un'idea.

[AFABIO]

Da 'babatriestina' : "... e savevo che un funeral costa ( ma credo che un matrimonio costi assai de più, un vestito de sposa costa ben più che una cassa de morto, me par). "

...ergo, MULI e MULE, mantenerse sani (bever assai acqua!) e, soprattutto, mantenerse SINGLE !

Fabio

[molly]

mi me piasi l'idea che co morirò qualcun affiderà le mie ceneri al mar.. no so perchè ma me piasi..

ma disè che inquina sul serio?

se inquina allora no me va ben.. altrimenti si..

no go capi cosa c'entra la Chiesa in questo... ghe cambia se un vien cremado o se vien messo in una tomba? me par de no.. e quindi cosa ghe cambia se quelle ceneri le metto casa, in mar o in giardin?

mi penso che el corpo xe un involucro, quel che l'anima e lo spirito lasa dopo morir xe un involucro vuoto, mi no credo nell'andar trovar le persone in cimitero perchè lore no le xe più là.. quel che xe là xe el loro involucro umano, che pian pian in qualche modo diventa comunque cenere o terra come disi lo stesso sacerdote..

riguardo i costi penso non cambierà sai dal farse cremar e metter le ceneri nelle urne..

qualcun ga pur de brusar el corpo e riporlo da qualche parte...

[Starlite]

Da 'babatriestina' : "... e savevo che un funeral costa ( ma credo che un matrimonio costi assai de più, un vestito de sposa costa ben più che una cassa de morto, me par). "

...ergo, MULI e MULE, mantenerse sani (bever assai acqua!) e, soprattutto, mantenerse SINGLE !

Fabio

Ahahahahahaahahhahahahahahahahahahahahahahahahah

Comunque... no sarà più le "categorie" de funaral, de nome forsi, ma le xe... oltre a pagar più o meno la cassa se paga più o meno l'allestimento e el tipo de saletta per l'esposizion, con robe che secondo mi xe ridicole perché gaver la saletta grande el doppio con le poltroncine e tanto de sfondo con riproduzion de affresco retroilluminado!

Per dar un'idea, un funeral (senza cremazion) con prestazioni disemo "base" (cassa normale, camera ardente normale, decorazioni floreali minime) vien sui 2500 € a cui xe de aggiunger el necrologio (tipicamente almeno 200 €) e un vaso per i fiori per la tomba (dai 100 € in su) e el contratto per el lumin (sui 20 euro me par). E dura 10 anni.

[babatriestina]

oltre a pagar più o meno la cassa se paga più o meno l'allestimento e el tipo de saletta per l'esposizion, con robe che secondo mi xe ridicole perché gaver la saletta grande el doppio con le poltroncine e tanto de sfondo con riproduzion de affresco retroilluminado!

mi roba simile al cimitero de sant'Anna no go mai visto!

qua le salette a mi me par tute precise e no i me ga domandado per la saletta, no ghe xe poltroncine se no una sedia per i dolenti e afresco retroilluminado no so cossa che sia, ma a Trieste mai visto, essì che son stada a funerai, anch recentemente, purtroppo!

decorazioni floreali? quele un va a farsele del fioraio, no del impresario, almeno se usava cussì. i parenti più prossimi fa el copribara e i meno prossimi una corona.. e dipendi dei fiori: garofani costa meno , rose xe più caro.

comunque queste xe le tariffe acegas

http://www.acegas-aps.it/cms.php?sz=600

[Starlite]

qua le salette a mi me par tute precise e no i me ga domandado per la saletta, no ghe xe poltroncine se no una sedia per i dolenti e afresco retroilluminado no so cossa che sia, ma a Trieste mai visto, essì che son stada a funerai, anch recentemente, purtroppo!

Per fortuna nisun fa lo sfondo retroilluminado. Co lo go visto a catalogo stavo per riderghe in muso alla signora dell'Acegas, nonostante tutto.

Le salette più grandi xe una o due a Sant'Anna.

[babatriestina]

stavo per riderghe in muso alla signora dell'Acegas, nonostante tutto.

mi confesso che per el funeral de papà i me ga strappado un sorriso, con tuto che iero assai zo, che go prenotado la macchina, quela volta iera ancora la Cappella de l'ospedal e de là se andava a S Anna in macchina, mi no me sentivo de guidar, po, che funeral con una 500 turchese, e go ciolto una macchina con autista e el me fa: ma per el Cimitero, sola andata

[Stefano79]

ma credo che un matrimonio costi assai de più, un vestito de sposa costa ben più che una cassa de morto, me par

Certo, anche là el mercato se aprofita, ma quel almeno xe una scelta...

[Ghost]

Contrario. Lo trovo abbastanza inutile e non igenico.

Già per strada abbia cacche di cane, gomme americane, scovazze cicche ed ora vogliamo aggiungerci le ceneri di nonna?

Sono polveri sottili che asportate dal vento sporcano e venogno respirate.

Anche se supportato da credenze religiose rimane una dispersione di rifiuto organico.

[molly]

quindi xe vero che inquina?

allora contraria pure mi..

nella mia ignoranza non pensavo che inquinasi dato che xe terra.. pecca..

ma inquina anche co te fa la cremazion?

Modificato 26 Maggio 2010 da molly

[arska]

ma scuseme cossa volè che inquini? Miga i ve le buta sule straze a sugar.

E po' xe residui organici, quindi (presumo) anche biodegradabili totalmente.

E xe anche de considerar che le quantità saria veramente modiche. Anche se (meti caso) ghe saria qualche decina de dispersioni al giorno, credo che l'inquinamento real saria veramente ridicolo.

[Starlite]

Ghost: la cremazion avvien a 800-1000°C Sai poco resta de organico. O meio... organi e tessuti & co. se vaporizza, resta solo finissimi frammenti ossei praticamente liofilizzadi. Quindi sai poco credo che possi inquinar e sai poco pericololi come "rifiuti organici" possi esser.

[molly]

me confonde