i pregiudizi

[basketteam]

no savevo dove verzer questa discussion e neanche come intitolarla...

ve spiego el fatto...

oggi pomeriggio in pineta a barcola iera una folla disumana, nianche a ferragosto tanta gente, no se trovava un parcheggio che sia uno da Piazzal Kennedy al bivio...

son sta un paio de ore al bagno e un mio amico me conta che poco prima che rivo el ga cercà de andar in acqua con la fia de 10 mesi in brazo là del scivolo dove i metti in mar i mosconi (poco prima del cedas, sulla curva della pineta per intenderse). Col xe rivà vizin l'acqua causa el limo per terra el mulo sbrisa e el casca, fin l'ultimo el cerca de tenir la fia ma col xe quasi pertera la ghe scivola (per fortuna no se fa mal nessun, solo tanta paura). Ovviamente la picinina ciapa un colpo ma soprattutto tanta paura e la se metti a urlar, lui ciapa ancora più paura e nella concitazion el sbrisa de novo sul limo e el ziga aiuto vedendo sta picia che urla 1 metro più in là...

ecco, con tutta la gente che iera a Barcola e in acqua in quel momento NISUN ghe va vizin a veder se el ga bisogno de una man, nisun tranne un mulo straniero (albanese) che corri a recuperarghe la picia e lo iuta a tirarse su...

fa tanto scalpor quando xe i stranieri a commetter crimini che tutti e pronti ad additarli come el mal dell'Italia e dopo se rendemo (noi triestini, italiani...) protagonisti de episodi de inciviltà come questo e ricevemo lezioni de umanità da quei che troppo spesso additemo come delinquenti e criminali forse solo per pregiudizio...

bravo sto mulo e VERGOGNA a tutti i altri presenti (e ghe ne iera tanti) sul lungomare!!

[Roby]

Ciò no go parole...

Passi la maleducazion tra gente che no te rispondi, sbati le porte, insulta senza motivo (persino sul lavor mio, e xè un servizio pubblico) ma qua se tratta de civiltà oltre che de umanità... l'omo, ma sopratutto la picia, i poteva farse parecchio mal, specie se scivolando i sbateva la testa ecc ecc.

Me associo a ti, proprio vergogna a quei bagnanti spettatori!

Secondo mi i pregiudizi comunque i deriva sia dall'ignoranza e comodità (xè facile ciaparsela coi deboli o le minoranze, facili da identificar ) che anche da calcoli dei potenti, savè come i disi: "Dividi et impera" ... (dividi e governa)

Mi da parte mia cerco nei ritai de tempo de aiutar altri nel mio picio canton de vita; un domani penso (la ciama legge del TAO) che ognun ingruma quel che semina...

[Nona Picia]

Che vergogna! Quei bagnanti ga dà veramente un bel spetacolo! De cossa i gaveva paura, che que povereto e la sua picinina ghe dassi un colpo in testa, come che i se gavessi merità?

[Damia]

beh el palazzo dove che stago mi xe rivado un clan rumeno (veramente xe una folla...i gà ciolto due appartamenti enormi) e xe gli unici che cò i vedi mia mamma (che la va per i 70...) per le scale de matina co' la spesa i ghe la porta su. No la gà mai domandado niente eh? Ma i muleti (ghe ne gò visti un tre tra i 14 e i 17 anni penso) vedi che la fa fadiga e i ghe la porta su.

[Renè]

intanto bisogna far dei distinguo..se in Italia un crimine comeso dei clandestini fa scalpor xè proprio perché in sti ultimi anni xè sta un'escalation de eferateze e violenze, sopratuto nel Veneto..e no xè pregiudizi, xè fati bruti che zerta gentaglia fa perché sa ben che in Italia con le legi cul che gavemo, ghe 'ndarà sempre ben..dopo dò giorni i xè a pié libero, anca se i ga trucidà qualcun (come acadi sempre in Veneto)

Sinceramente me par un po' azardà meter a confronto ste' gravità con qualche mona che no iuta chi ga sbrisà par tera, con rispeto del tuo amico..

Deto questo no xè un problema de razismo o pregiudizio..la maleducazion e la monagine no ga raza..la xè dapertuto, anca un bambin lo sa.

Me ricordo ancora, come tanti del morto a Barcola, coi bagnanti che no i lo gaveva nianca in tel cul..me ricordo anca de una signora che zercava disperada la sua gatina fugida in strada e la zigava: "aiuto..dove xè la mia bambina?"..podeva benisimo eser una bambina vera per quel che ne saveva la gente atorno..epur nisun se ga moso el dedrio per darghe na man..

In questo caso del topic, per l'apunto bravo al tipo che se ga moso per iutar, anca se inveze che albanese podeva benisimo eser senegalese, cinese, american, irlandese o italian. Purtropo in tuto el mondo sarà sempre la persona gentile che iuta el prosimo in dificoltà e el mona che inveze se fa i cavoli sui. xè cusì dai tempi de l'età dela piera e sarà cussì ancora a lungo. L'importante per l'apunto xè che comunque esisterà sempre una persona gentile..sperando de gaver fortuna che la sia presente al posto giusto nel momento giusto.

Modificato 22 Giugno 2008 da Renè

[dido76]

quel che però no vien spesso dito dai media in generale xè che le statistiche in realtà parla a favor dei stranieri.... la magior parte de violenze in italia xè commesse da non stranieri, sopratuto quele domestiche...

solo che quando se senti de violenze fate da un straniero vien recepido in modo diverso...

[b-chris]

Mi penso anche che oltre a non intervenir bona parte de quei presenti gaverà pensà " ara sto mona che se ribalta e che ghe fa del mal ala picia,insempià proprio là te dovevi andar?"

Percentualmente malefatte, buone azioni o semplici azioni xe fatte maggiormente dai italiani semplicemente perchè semo de più. Dopo se invece xe de mezzo un extracomunitario vien dado maggior risalto.

Ma gavemo cussì bisogno del babezo? O semplice bisogno de termine de confronto? "Questi xe i cattivi, noi semo meio" o " se fin lori xe boni allora noi fazemo veramente ca###r".

Cmq , la diffidenza o indifferenza a volte xe veramente terribile, a che punto fossi forsi intervenudi i presenti? se la picia stava annegando? o se el pare perdeva i sensi sbattendo el groppon?

"Ah , se ga solo ribaltà, adesso se rialza solo"

[zalzi]

Mi penso anche che oltre a non intervenir bona parte de quei presenti gaverà pensà " ara sto mona che se ribalta e che ghe fa del mal ala picia,insempià proprio là te dovevi andar?"

da madre, confermo che esisti nei confronti dei (piu' o meno) giovani padri una specie de maschilismo al contrario, spesso da parte de signore de mezza eta'. anche questo xe un pregiudizio bel e bon.

[diego]

Rene -intanto bisogna far dei distinguo..se in Italia un crimine comeso dei clandestini fa scalpor xè proprio perché in sti ultimi anni xè sta un'escalation de eferateze e violenze, sopratuto nel Veneto..e no xè pregiudizi, xè fati bruti che zerta gentaglia fa perché sa ben che in Italia con le legi cul che gavemo, ghe 'ndarà sempre ben..dopo dò giorni i xè a pié libero, anca se i ga trucidà qualcun (come acadi sempre in Veneto)

No te rivi a far un discorso senza meter in mezzo l'extracomunitario o el stranier. Ma xe proprio una fobia la tua.

Me par che el discorso iera riferido alla solidarietà e quindi no centra un santo ......la tua frase iniziale.

I bastardi e maleducai e quei che no ghe frega niente dei altri esisti a Trieste, a New York, a Mosca e in tutto el mondo.Resta el fatto (fattaccio per ti) che l'unico a dimostrar solidarietà xe stado un Albanese e no xe la prima volta.

[Renè]

Scusa tanto Diego, ma ti no te ga capì nula de mi e nemeno del mio discorso più sù (interpretado de ti come al solito ala ca..volo de can, secondo el tuo metro politico de pensier) e come al solito te la buti in politica (faziosa), dandome anca del razista in sotointeso (molto gentil de parte tua che manco te me conossi)..e pensar che son sta fra i fondatori de un'asociazion onlus multiculturale asieme ad amici de svariade etnie, tuti studenti del colegio del mondo unito, con cui go colaborà volentieri per anni. Pensa ti Diego che tremendo pericolo i ga corso con un tepiston legera come mi !

E bevemo vanti ah

P.s.: de ora in avanti smeterò de risponder ale provocazioni del signor Diego, go de meo de far che intortarme in inutili flame (che prima de tuto no servi al forum e svia l'argomento) de un fissà de politica che vedi il babau fin dentro el condoto. Sempre che anca in un topic X indove parlo magari de cocktail de scampi, no el vegni fora anca lì con qualche sua solita filipica de "so tuto mi perché son de la parte giusta", fora tema peraltro e ofendendo.

Senza polemica, per mi xè chiusa qui la question.

[Starlite]

Stè 'tenti che ve controlo

[basketteam]

intervengo mi...

spero te stemperar la tension...

mi go verto questo topic per segnalar, primo che la maleducazion impera anche quando se tratta de un picinin che strilla perchè se ga fatto mal

secondo per sottolinear el fatto che un ragazzo albanese ghe ga dà una gran lezion de civiltà a tutti quei che iera in spiaggia in quel momento.. proprio in questo periodo in cui se tendi a idealizzar el straniero come el delinquente (disemo purtroppo che molti de lori no fa niente per toglierse quest'etichetta de dosso, xe de dir la verità...)

no voleva esserghe risvolti politici nella question... a Barcola pur essendoghe tante persone no iera nè el mortadella in bici nè el nano con la bandana

[bronza coverta]

a Barcola pur essendoghe tante persone no iera nè el mortadella in bici nè el nano con la bandana

Ah sì, xè vero.........lori va alle ginestre!!!!

[Kimy]

E dove xe scritto che gli stranieri xe tutti cattivi e va solo casin... Come noi xe gente e gente... Per le persone che iera la e non ga fatto niente, be evidentemente le loro vite xe molto impegnade e se sa orami gavemo il cul pien de tutto che non aprezzemo neanche i gesti più semplici ne cerchemo de aiutar il prossimo, ma solo a inc....o

Iera l'anno scorso o do anni fa il caso del straniero morto in fiume per portar in salvo un picinin, più o meno la scena la doveva esser uguale...

Non xe de generalizar su ste robe, esisti gente e gentaglia, l'omo xe fatto cusi... poco cosa far...

[dido76]

no voleva esserghe risvolti politici nella question... a Barcola pur essendoghe tante persone no iera nè el mortadella in bici nè el nano con la bandana

moniga...te ga sbaglia cità...se te volevi veder el mortadela in bici...quà xè esclusiva de qualchedun altro la bici

a parte i scherzi...i pregiudizi xè + creadi dale persone...ogni tanto la politica da un aiuto a farli venir un poco de + fora (da una parte e dal'altra)...ma in sti casi qua no c'entra niente...

xè solo la mentalità dela gente che prima o poi se spera doveria cambiar

[molly]

riguardo alla maleducazion:

ma semo sicuri che la gente là in giro se ga accorto de quel che iera successo? i ga senti i gridi de aiuto?

mi fin deso co me xe capita de gaver bisogno de aiuto son sta sempre aiutada da sconosciuti.. a volte go chiesto e a volte no...

comunque quoto el discorso de Renè.. nel senso che non xe giusto però i pregiudizi sugli stranieri i xe per el semplice fatto che alcuni de lori (non tutti chiaramente) i fa malefatte... e le fa dopo che xe stadi accolti ed anche ben nel nostro paese. Questa xe una realtà con cui i ga de viverghe sopratutto nel Veneto ... un mio amico de Bergamo me ga sorpreso co me ga dito che qua a Trieste xe davvero bel perchè xe pochissimi extra comunitari, che la de lui invece xe almeno tre rapine all'ordine del giorno per non parlar dei furti nelle case, a lui ghe ga frega anche i cercioni delle riode e i ga zerca de intrufolarse in casa sua ma per fortuna co suo papà se ga sveia e li ga sorpresi xe scampai via..

[basketteam]

moniga...te ga sbaglia cità...se te volevi veder el mortadela in bici...quà xè esclusiva de qualchedun altro la bici

orca cio... te ga ragion

quel che sgomina intere bande de terribili assassini in sella al suo prode destriero

[trixie]

devo dir che la gente

xe sempre più menefreghista

me xe capità più de qualchevolta

veder veceti che perdi l'equilibrio

smontando o montando dal bus, anche persone giovani

che se intoppa per strada, che casca col scooter ma vedo sempre meno

gente che se smovi, che intervien a iutar

pareria quasi che i guarda e i spera che i se rangi soli.

Per quel che riguarda i pregiudizi, concordo

che de solito ghe vien dà maggior risalto alla nazionalità

in caso de reati o incidenti.

Per ultimo ve posso contar che un mio

carissimo amico , ga portà a Trieste

la famiglia, pur continuando a lavorar

a Bologna, perchè el disi che xe impossibile viver

in una città che ormai xe in man a bande de albanesi e

romeni.

[Damia]

devo dir che la gente

xe sempre più menefreghista

me xe capità più de qualchevolta

veder veceti che perdi l'equilibrio

smontando o montando dal bus, anche persone giovani

che se intoppa per strada, che casca col scooter ma vedo sempre meno

gente che se smovi, che intervien a iutar

pareria quasi che i guarda e i spera che i se rangi soli.

In realtà xe proprio questo, la gente se fa sempre de + i fatti suoi, ma rivando a livei de paura....anche tropo!

[Renè]

riguardo alla maleducazion:

nel senso che non xe giusto però i pregiudizi sugli stranieri i xe per el semplice fatto che alcuni de lori (non tutti chiaramente) i fa malefatte... e le fa dopo che xe stadi accolti ed anche ben nel nostro paese. Questa xe una realtà con cui i ga de viverghe sopratutto nel Veneto ...

..infati questo volevo dir, no generalizar disendo che tuti i esteri xè per forza ladri, asasini ecetera, come disi i cremino brezniev. E iera comunque un fugace esempio per dir in pratica quel che ga dito anca Cris 73. Cioè che no xè pregiudizi, ma maleducazion che la xè sempre stada citadina del mondo. Xè una carateristica umana anca quela. Dapertuto se pol trovar la persona gentile ma anca quela no gentil, aldilà del logo. E sul serio intendevo el bravo al'albanese, no iera ironico come el minculpop credi.

Forsi son stado tropo framentario nel'espor la mia opinion in merito e subito xè stada rigirada (volendo? ) de chi so mi. Ma in sto caso per l'apunto razismi e politica no ghe entra. Anca mi me xè capità zente che no se moveria per iutarte manco se te neghi. Po' se proprio volemo far un discorso de "razismo" alora poso dir che tanti de qui (triestini e vizini de casa come bisiachi ecc..) i xè fati cusì (cioè indiferenti a tuto) perché forsi se ga conservà in zerti casi quela fredeza tipica austroungarica (no cativeria..solo fredeza e indiferenza de fondo). Tanti secoli de Austria no te li pol cancelar tuti in un colpo dal dna. E torno a ripeter l'esempio del morto a Barcola, coi bagnanti che i fazeva el bagno co' la salma vizin e nianca per cul

[Damia]

riguardo alla maleducazion:

nel senso che non xe giusto però i pregiudizi sugli stranieri i xe per el semplice fatto che alcuni de lori (non tutti chiaramente) i fa malefatte... e le fa dopo che xe stadi accolti ed anche ben nel nostro paese. Questa xe una realtà con cui i ga de viverghe sopratutto nel Veneto ...

..infati questo volevo dir, no generalizar disendo che tuti i esteri xè per forza ladri, asasini ecetera, come disi i cremino brezniev. E iera comunque un fugace esempio per dir in pratica quel che ga dito anca Cris 73. Cioè che no xè pregiudizi, ma maleducazion che la xè sempre stada citadina del mondo. Xè una carateristica umana anca quela. Dapertuto se pol trovar la persona gentile ma anca quela no gentil, aldilà del logo. E sul serio intendevo el bravo al'albanese, no iera ironico come el minculpop credi.

Forsi son stado tropo framentario nel'espor la mia opinion in merito e subito xè stada rigirada (volendo? ) de chi so mi. Ma in sto caso per l'apunto razismi e politica no ghe entra. Anca mi me xè capità zente che no se moveria per iutarte manco se te neghi. Po' se proprio volemo far un discorso de "razismo" alora poso dir che tanti de qui (triestini e vizini de casa come bisiachi ecc..) i xè fati cusì (cioè indiferenti a tuto) perché forsi se ga conservà in zerti casi quela fredeza tipica austroungarica (no cativeria..solo fredeza e indiferenza de fondo). Tanti secoli de Austria no te li pol cancelar tuti in un colpo dal dna. E torno a ripeter l'esempio del morto a Barcola, coi bagnanti che i fazeva el bagno co' la salma vizin e nianca per cul

Mah te dirò, no so quanto centri l'origine...austroungarica, perchè posso dir che l'altro anno che ierimo in Austria come turisti gavemo ricevudo un trattamento eccellente da tutti in tuti i loghi.

No so se podessi dir la stessa roba de qua...

[Renè]

Beh, coi turisti che porta soldi no i li manderà zerto in mona Inoltre anca qua no voio dir de tuti. Xè comunque inegabile che alcuni popoli nordici (in primis la Germania) i xè per natura impostadi in un certo modo de caratere. Oviamente no con cativeria.

me ricordo sempre un mio caro amico, che xè nato a Dusseldorf, ga passà la prima infanzia a Milan, l'adolescenza a Bologna, po' xè 'nda qualche tempo a Basilea, infine se ga stabilì in Friul per ben, anca se volessi trovar casa a Trieste, zità nadal de su pare. Ben, me ricordo le sue parole cò iera un periodo qui a Trieste ad abitar..: " E incredibile!! Ho sempre girato e vissuto in vari luoghi ed ho sempre trovato cortesia. Qui a Trieste ho chiesto a dei colleghi alla fine di una giornata di lavoro, di andarsi a mangiare una pizza..ho cercato di ambientarmi, di socializzare, ma a parte te, Elisa e Marco, tutti gli altri per i cavoli suoi, come se fosse quasi una cosa possibilmente evitabile. Giro di sera per il rione dove sto in affitto e trovo ognuno con la propria compagnia al bar. Provo ad attaccare discorso in qualche bar dello sport e solo uno o due mi rispondono!!"

Tignindo conto che forsi la reazion del mio amico xè anca ingigantida ed esagerada dal fato de no rivarse subito ad ambientar, comunque me ga fato pensar.

Modificato 23 Giugno 2008 da Renè

[Damia]

Beh, coi turisti che porta soldi no i li manderà zerto in mona

odio...questo xe vero, ma me par che 'sai comesi triestini sta roba no la gà in testa.

No digo tuti, ma xe innegabile che qua i comesi dei negozi no xe famosi per la loro...gentilezza.

Qui a Trieste ho chiesto a dei colleghi alla fine di una giornata di lavoro, di andarsi a mangiare una pizza..ho cercato di ambientarmi, di socializzare, ma a parte te, Elisa e Marco, tutti gli altri per i cavoli suoi, come se fosse quasi una cosa possibilmente evitabile. Giro di sera per il rione dove sto in affitto e trovo ognuno con la propria compagnia al bar. Provo ad attaccare discorso in qualche bar dello sport e solo uno o due mi rispondono!!"

Tignindo conto che forsi la reazion del mio amico xè anca ingigantida ed esagerada dal fato de no rivarse subito ad ambientar, comunque me ga fato pensar.

nol gà tuti i torti. da sto punto de vista semo abastanza chiusetti questo xe vero...

dio anche mi sul lavor me piasi bastanza separar le robe...però se gò un/a collega che vien de fora... e gà de ambientarse, magari fazo un'eccezion...anche se de mi xe sai dificile...(per lo + gira o triestini o studenti universitari)

[diego]

Adesso son mi che go capido mal el tuo discorso? te son sta l'unico a inserir la parola straniero (questo si volutamente) nella risposta ...Sarà un caso? Rene xe brutto mentir savendo de mentir!!! Che dopo ti te sia fondator de qualcosa personalmente me fa pensar molto dopo aver letto certi tuoi interventi. Ma te ga ragion, no sta risponderme MAI più ,xe mi che son un "bastardo" dentro e che me piasi veder el bruto anche dove che nol xe. Poderia anche dirte che go conosudo svariate persone come ti e che ragionava esattamente come ti.E come ti i me faseva sai paura. Bravo , bevemo ancora

[SandroWeb]

(OT) Prima che ve vegni mal de panza a voi e brusori de stomigo a mi, ve ricordo che xe anche i mp per chiarir robe che xe meio chiarir in privè piuttosto che in pubblico.

Grazie